Gipasanginlang “mamarang” gipatay

CEBU, Philippines - Usa ka 70- anyos nga lola nga gidudahang usa ka mamarang ang gipusil patay samtang nag-inusara nga nagtan-aw og salida sa telebisyon sa pinuy-anan niini sa Sityo Kalasa sa barangay Colasi, lungsod sa Samboan niadtong Sabado sa 1:00 sa hapon.
Ang biktima nga patay diha-diha mao si Bartola Catubig, byuda ug nagpuyo sa maong lugar kinsa sumala pa sa kapolisan gihulagway sa mga silingan nga usa ka mamarang sa maong lugar.
Tulo ka mga wala mailhing lalaki ang gitumbok nga mipatay sa biktima. Sila miikyas luwan sa usa ka motorsiklo human sa krimen. Matud ni PO1 Joseph Rodney Belangoy sa Samboan Police Station dihang nahinabi sa Banat News subay sa nakuha nilang impormasyon gikan sa mga silingan nga ang biktima nag-inusarang nagtan-aw og TV ang biktima kay milakaw ang iyang apo. Gituohan nga ang mga mamumuno nangayo pa og tubig sa biktima tungod kay duna pay tubig mainom diha sa gipatong sa bintana dapit sa may birha kay naka-lock ang pultahan sa biktima.
Nagtuo ang mga imbestigador nga diha sa may birha nagpahipi ang gunman ug pagtunol sa tubig gipusil ang tiguwang sa ibabaw nga bahin sa walang dughan ug pagkahuman namiya ang mga mamumuno.
Ang apo sa biktima nga wala makuha ang pangalan maoy nakadiskobri sa patay’ng lawas nga nagbuy-od sulod sa pinuy-anan nila nga dunay samad pinusilan sa ibabaw nga bahin sa walang dughan, usa ka slug nga gituohang gikan sa usa ka kalibre .45 nga armas ang nakuha diha sa crime scene.
Gisubay karon sa kapolisan ang anggulo nga may kalambigitan sa gidungog nga pamarang ang motibo sa krimen tungod kay wala kuhaa sa mga mamumuno ang cellphone ug mga gamit sa biktima. (Darrel A. Carumba/EIM) (BANAT BALITA)

10 nasikop sa illegal nga kalihokan.,,.

NAPULO ang nasikop sa pagpangroda sa kapulisan sa managlahing dapit sa lalawigan sa Sugbo, naglakip sa mga drug pusher, drug user ug gun-for-hire niadtong Sabado ug Dominggo sa miaging semana.
Si Abraham Brigoli, 30, ulitawo ug taga Barangay Dakit, lungsod sa Sogod, suspek nga gun-for-hire, ug kaubang gidudahang pusher nga si Ronel Malirong, 21, ulitawo ug taga Barangay 8, lungsod sa Tuburan, nasikop sud sa ilang hideout sa Barangay Sumon, Tuburan niadtong Sabado sa buntag, apan ang ilang lider nga si Johnny Ylanan nakasibat.
Si Brigoli nakuhaag usa ka kalibre .45, puno sa bala, KG-9 sub-machine pistol, puno sa bala nga magazine, silencer, granada, P250. Si Malirong nakuhaag granada, tulo ka medium size nga putos sa shabu, duha ka pakiteng shabu, mga drug paraphernalia, usa ka shot gun nga puno sa bala, laing bala sa shotgun nga usa ka bakos.
Si PO2 Dexter Arapoc sa Tuburan police, nagkanayon nga nipahigayon silag Internal Security Operation (ISO) pinangulohan sa ilang hepe sa kabukirang lugar batok sa mga kriminal.
Target sa ISO si Johnny Ylana, kinsa may daghang kasong pagpatay, drugas ug nakaeskapo sa sa bilangguan nga nasigpatan sa dapit.
Sa laing bahin, giilang big-time drug pusher nakaipsot sa pinusilay tali sa kapulisan apan ang iyang anak nga gidudahang drug pusher usab, bata-bata ug unom ka manuyopay, duha ka menor de edad, nasikop kagahapon sa ala 1:30 sa kaadlawon sa Sitio Carpo, Barangay Tuba, lungsod sa Dalaguete.
Gipusasan si Mark Raymond Muñoz, bata-bata nga si Jefferson Antipala, pulos nag-edad og kapin sa 20, ang manuypay nga sila si Jomar Paz nga taga Dalaguete, Wilmar Latasa, Alvin Gonzaga, Aldrin Sevilla ug duha ka 17-anyos, pulos nga taga Argao.
Si Insp. Dexter Basirgo, hepe sa Dalaguete police, nagkanayon nga ang rumbo sa ilang operasyon mao si Wilfredo “Eddie” Muños, amahan ni Mark Raymod, kinsa giilang level 2 drug pusher sa lungsod.
Daghan nang nisumbong sa kapulisan bahin sa kalihokan sa mga Muñoz sa ilang dapit.
Usa ka pulis ang nagsilbing poseur-buyer nga nitunol sa P400 marked money apan daling nakabantay si Wilfredo sa awtoridad ug niaksyon kini sa pagbunot sa armas apan napasalbahan sa kapulisan hinungdan nga nakadagan.
Si Basirgo nagkanayon nga naigo niya si Wilfredo dihang nakasibat apan di siya makapaneguro kon fatal ba kini sanglit mga dugo lang ang nahibilin sa dapit.
Si Mark Raymond nakuhaan og 48 ka pakiteng shabu, nakuhaan sab sa drawer sa ilang lawak og .357 nga puno sa bala, usa ka .38 revolver nga gipanag-iya ni Wilfredo ug si Jefferson nakuhaan og 14 ka pakiteng shabu.
Tukmang kaso ang gikatakda nga ipasaka sa awtoridad karong adlawa batok sa mga suspek.

2 Ang Patay Sa Sunog sa Ermita!

DUHA ang patay ug 228 ka mga balay ang naugdaw sa sunog sa Sit­yo Bato, Barangay Ermita, dakbayan sa Sugbo niadtong Sabado sa gabii.
Usa ka 11-ka-buwan nga batang babaye ug 46-anyos nga babaye ang gikatahong nakalas sa maong sunog.
Ang kabomberohan ni­bana-bana sa danyos nga kapin sa P1 milyon ug ang alarma ilang nadawat sa alas 10:20 sa gabii samtang giisa kini sa Task Force Alpha tu­ngod sa kadako sa kayo.
Nakontrolar ang sunog human sa kapin sa oras uban sa pag-abag sa tanang kabomberoha sa dakbayan sa Sugbo ug kasikbit nga dakbayan ug kalungsoran.
Sa pasiunang imbestigasyon sa mga kabomberohan, ang sunog nagsugod sa balay ni Toribio Flores, Jr., kansang 11-ka-buwan nga anak nga si Mary Claire, napaig.
Si Flores, biyudo human namatay ang asawa sa pagpanganak sa bata, giingong nilakaw ug gi­bilin ang bata uban sa 10-anyos nga pag-u­mang­kon aron pagpalit og diaper atol sa pag-ulbo sa sunog.
Ang 10-anyos nga ba­ta nakadagan sa pag-ulbo sa sunog.
“We waited for the fire to be totally out before searching the said fatality,” matod ni FO3 Lowel Opolentisima sa Sun.Star Cebu, diin ala una na sa hapon kagahapon nakita ang paig nga bata.
Lain usab namatay atol sa sunog mao si Belinda Cabigon, 46, giataki sa sakit sa
kasingka­sing.
Si PO1 Dennis Orno­pia sa Carbon police niingon nga may mga balay nga nalakip sa sunog ang gidudahang suyopanan sa gidiling drugas.
Atol ning pagsuwat, wa pa masayri ang tino nga hinungdan sa pag-ulbo sa sunog gikan sa balay ni Flores ug kini daling nikatap tungod sa halos tanang balay ginama sa light matertials.
Si Alvin Santillana, action officer sa Local Disaster Risk Reduction and Management Cou­ncil, nagkanayon nga kapin sa 20 ka tawo nga natanggong sa via duct sa South Road Properties (SRP) ang naluwas sa Bantay Dagat.
Dugang ni Santillana, dunay daghang tawo ang nasamad, napaso ug natunok gumikan kay nisuway pa sila og luwas sa ilang mga butang nga gitabang sa medical team.
Dali usab nakares­ponde ang Department of Social Welfare and Ser­vices (DSWS) alang sa libreng pagkaon sa mga nasunogan.
Si Kapitan Antonieto Flores nitug-an sa Sun.Star Superbalita natigom sila ni Mayor Michael Rama atol sa pagsuwat ug ilang gihisgutan ang lugar nga nasunogan.
Gipaabot nga karong adlawa madeklarar ang state of calamity aron da­ling makapagawas og pundo ang barangay.
Sa pagkakaron, ang barangay hall sa Ermita padayong nanawat sa hi­nabang sama sa sinina ug mga pagkaon pinaagi sa kontak sa (032) 255-7291.

Batang babaye ge rape,

WA NAY kinabuhi ang 9-anyos nga babaye sa dihang napalgan sa mga sakop sa clean and green office nga nanghinlo sa tag-as nga mga sagbot atbang sa Hoopsdome sa barangay Gun-ob, Lapu-Lapu City kagahapon sa buntag.
Samtang sangko sa langit ang pagmahay sa suspek nga si Junniel Dusaban alyas Jojo, 21, adunay live-in partner, construction worker, taga-barangay Kabkaban, Barili, Sugbo nga nitahan sa kapulisan.
Nakugang ang mga sakop sa clean and green nga sila si Jimmy Duero ug Dante Lamban nga mihimo og clearing operation sa bakante nga lote atubangan sa Police Station 3 sa Lapu-Lapu City Police Office (LLCPO) kagahapon sa alas 8:30 sa buntag sa dihang ilang nakit-an ang lawas sa bata nga naghay-ad sa kasagbutan.
Giila ang biktima nga si Ella Marie Lasala, taga-Purok Balanghoy, Sityo Humay-Humay, Barangay Gun-ob.
Siya katapusan nga nakit-an niadtong miaging adlaw nga nakigduwa pa sa laing duha ka mga menor de edad.
Kagahapon sa buntag nasikop sa mga sakop sa Police Station 3 nga gipangulohan ni P/Sr Insp. Joeson Parallag si Dusaban sa dihang mihaom ang description sa duha ka mga menor de edad nga gikaduwa niadtong higayona sa biktima nga maoy ilang nakit-ang gikuyogan niini.
Wa maglisod ang kapulisan sa pagtumbok ni Dusaban human siya niangkon sa iyang nahimo ngadto sa biktima apan iyang giklaro nga wa siyay tuyo sa pagpatay niini.
Saysay ni Dusaban sa dihang nahinabi sa Sun.Star Superbalita nga nawala siya sa iyang kaugalingon niadtong miaging gabii tungod sa iyang kahubog sa dihang nakig-inom siya sa iyang kauban sa construction work.
“Niduol to siya (biktima) nako kay nangayo og kuwarta. Unya nisunod ra pud siya nako sa libon,” dason sa suspek.
Asoy ni Dusaban nga paghiabot na sa ngitngit ug ka­sagbutan, didto na niya gi-among-amongan ang biktima.
Siya nitug-an nga nisuway sa paglugnot ang bata apan way igong kusog sa pagsukol tungod sa gidak-on sa iyang lawas.
Sumala pa sa suspek nga iyang gisap-ongan pag-ayo ang baba sa bata ginamit ang iyang palad aron di madunggan ang singgit samtang mihimo siya sa iyang dautang tinguha.
“Dili man ma, nibiya lang pud dayon ko. Wala ko kahibawo kon naunsa to siya,” matod ni Dusaban.Igo nalang sa pagtiyabaw ang inahan ni Ella Marie nga si Lanie, 31, nga nagsud-ong sa patay niyang anak nga napalgan mga 100 metros gikan sa Station 3.
Siya niingon nga wa siya magdahom nga mao kadto ang mahitabo sa ilang anak.
Matod niya nga naandan na sa iyang anak nga di mouli sa ilaha kay sa laing balay matulog kuyog ang mga higala niini.
Siya niangkon nga upat na ka mga adlaw nga wa mopauli ang iyang anak sa ilang balay.
Nakit-an pa kini niya niadtong miaging gabii nga nakigduwa sa iyang mga higala.
“Pirme man na nako siya pangitaon matag gabii. Apas-apason pa nako kay di man siya mouli sa balay. Madala lang sa barkada,” matod ni Lanie sa Sun.Star Superbalita.
Nawalis diha na sa dughan ang t-shirt sa biktima samtang wa na magsul-ob og underwear ingon man shorts dihang napalgan.
Gipasabot ni Parallag nga nianang pagka-gabii aduna silay gitubag nga alarma sa pagpamusil sa manag-uyab sa barangay Babag hinungdan didto ang iyang mga sakop sa nahitaboan.
Samtang ang alarma may labot sa pagpanglugos nadangat kagahapon lang sa buntag. (Sheila Nica Ursabia & Jessa Leopardas-CNU Comm Interns Sun.Star Superbalita)