Monday, August 12, 2013

Taya' sa lata maoy nakahilo sa pamilya

HEAVY metal poisoning ang giingong namatyan sa 18 anyos nga maguwang nga babaye sa upat ka managsuon nga nakakaon og delata nga beef loaf sa Barangay Poblacion, lungsod sa Alcoy, Sugbo.
Ang nahibilin nga duha ka mga manghod nga nikaon sab og apil sa beef loaf ang atua na karon sa Manila alang sa toxicology studies, sumala pa ni Dr. Cynthia Genosolango, officer-in-charge sa Integrated Provincial Health Office (IPHO).Matod niya susihon sa mga tinugyanan sa Rural Health Unit ug Provincial Epidemiological and Surveillance Unit nga nituyo pag-adto sa gipuy-an sa mga biktima, kon “expired” ba ang beefloaf nga ilang nakaon.
Ang lata nga makuha sab nila, ang isumitir ngadto sa hingtungdang ahensiya alang sa himuon nga pakisusi.
Base sa death certificate ni Lyza Marie Yman, 18, siya namatay sa multi organ failure secondary to food poisoning and possible heavy metal poisoning.
Siya namatay niadtong Agusto 10 sa Chong Hua Hospital. Una siyang gidala sa Cardinal Rosales Memorial Hospital sa lungsod sa Dalaguete human siya mireklamo nga nanakit ang iyang tiyan ug nagsukasuka human makakaon og delata nga beef loaf.
Ang iyang manghod nga si Levy Mae Yman, 17, unang namatay niadtong Agusto 6 sa mismong balay sa kanhi municipal health officer sa lungsod sa Alcoy human sab nagsige na og suka og nanakit sab ang tiyan.
Sa iyang death certificate, cardio pulmonary arrest secondary to severe dehydration and possible electrolyte imbalance ang hinungdan sa kamatayon niini.
Si Genosolango, nagtuo nga food poisoning ang namatyan sa duha ka magsuon. Apan ila
pang susihon kon unsa nga toxic substance ang nakasud sa ilang lawas.

Ang IPHO nisugyot nga ipa-autopsy ang lawas sa duha nga nangamatay alang sa dugang pakisusi.
Sigun sa report sa sanitary inspector sa Alcoy ngadto kang Genosolango base usab sa testimonya sa iyaan sa mga biktima nga nabantayan nila nga dunay taya sa lata ug sa mismong beef loaf.
“Unya ila lang kuno gi-scrape. Try to scrape it off and then cook and ate the beefloaf,” sugilon sa opisyal ngadto sa mga tigbalita base sa salaysay sa iyaan sa mga biktima.
Matod niya ang mga doktor sa CHH nitambag sa kabanay sa mga biktima nga ipadala ngadto sa kaulohan ang nahibilin nga duha ka mga bata alang sa to­xicology studies.
Kuhaan sila og blood samples aron madetermina kon unsa nga toxic substance ang nakasud sa ilang lawas human makakaon og beef loaf.
Si Gobernador Hilario Davide III sa iyang bahin, mangayo og tabang sa Bureau of Food and Drugs 7 labot sa hitabo.
Apan dihang nahinabi sa Sun.Star Superbalita si Rica Aumentado, OIC sa BFAD 7, siya niingon nga ang National Meat Inspection Commission na ang in-charge sa processed meat products.
Matod ni NMIS 7 regional technical director Romeo Capa nga maghuwat siya sa opisyal nga report sa meat inspection sa Alcoy.
Kon makompirmar na nila nga tayaan ug expired na ang beef loaf nga nakaon sa mga biktima, iyang ipatawag ang tagdumala sa brand sa beef loaf alang sa tukmang aksiyon nga himuon.
Si Genosolango nipasidaan sa publiko nga kinahanglan intact ang delata, dili taya-on, way lumping ug dili karaan og itsura ang paliton nga delata aron dili madisgrasiya sa pagkaon.

No comments:

Post a Comment

"Post a comments"